Tá oifigí cláraithe ag OISÍN i gCúil Aodha atá suite i gcroílár Ghaeltacht Mhúscraí in iarthar chontae Chorcaí. Táimid ag trádáil ó mhí Iúil 2004.
 

Ó thús, thug taithí agus cumas na bainistíochta, comhairleoirí agus aistritheoirí uile buntáiste láidir dúinn agus sinn ag teacht isteach sa mhargadh seo - rud atá imithe ó neart go neart ó shin. Tá OISÍN cláraithe le Oifig na gCuideachtaí mar ainm trádála do Oisín Seirbhísí Comhairle Teanga Teo. agus is comhlacht in úinéireacht phríobháideach é.

An bhéim ghnó atá in OISÍN is ea seirbhísí fónta i réimsí na pleanála agus comhairleoireachta, an aistriúcháin agus na foilsitheoireachta.

Stiúrthóir Bainistíochta

Cormac Ó hAodha is ainm don Stiúrthóir Bainistíochta agus tá taithí fhairsing aige i mórán gnéithe de theanga na Gaeilge. Tá cáilíocht M.Phil aige sa Ghaeilge ó Ollscoil na hÉireann (UCC) maraon le cáilíocht Ard-Dioplóma san Oideachas i múineadh na Gaeilge. Tá tréimhsí tugtha aige mar aistritheoir, fotheidealóir agus mar oifigeach forbartha gaeilge in údarás áitiúil in Éirinn maraon le roinnt blianta tugtha mar léachtóir le Gaeilge agus Léann Éireannach i Roinn na Briotáinise agus Sibhialtacht Cheilteach i Université Rennes 2 na Briotáine. Aithnítear é mar dhuine comhaimseartha a chuireann cultúr agus teanga na nGael chun cinn go gníomhach. Is é an fhealsúnacht atá aige féin, ag stiúrthóirí uile an chomhlachta agus an fhoireann ar fad in OISÍN ná go bhfuil an dínit agus an meas ceana tuillte ag gach uile duine más ag úsáid Gaeilge nó Béarla atáid.